Kum 2024 - 2025 chhûng khân he program kaltlangin vehbur vawi 14 kan khawn a, chuta thilpek lo lut zawng zawng chu ₹89,28,102/- (Nuaih sawmriat pakhua singhnih sang riat za leh pahnih) a ni.

Ṭanpui ngai lo lut zingah natna khirh vei emaw, damlo thih leh dam inkara awm te tân vehbur kan khawn ṭhin a. Chutihrualin, damlo emaw mi harsa mipui te rilru a tla na bik, ṭanpuina pek an duh avanga vehbur khawnsak tura an lo ngen hma kan lâksak an awm ve tawh bawk.

An eizawnna, chhûngkaw khawsak dinhmun, hnathawk thei awm zat, an sum dinhmun leh thildang te uluk takin kan zir chiang hmasa a. An khua/veng YMA/YLA leh VC te be pawpin an chanchin kan zawt chiang ṭhin bawk.

He hmalakna hnuaiah hian dam thei tura beiseina(survival chance) nei ṭha te kan dah pawimawh hmasa a. Tin, naupang leh ṭhalai hma hun la nei tam zawkte kan duhsak ve leh bawk. Mahse, kum upa lam te pawh an dinhmun a zirin hma lo lak sak nual tawh a ni.

A tlângpuiin ni 3 chhûng vehbur kan khawn ṭhin a, kan khawn zawh hnuah kan Finance Team-te'n a hun bithliah chhûng (specific period) a kan foundation Bank Statement-te an print chhuak leh vek a. Sumfai leh hmun danga lo lut a awm chuan chûngte nen belh khâwm leh in chu chu ‘Maker Checker System' hmangin endik leh vek ṭhin a ni.

Tin, sum leh pai kaihhnawih hi fimkhur ngai tak anih avangin, Finance Team te lo chu mi dangin pawimawh bikah lo chuan an khawih pawlh ngai lo a ni.