March 30, 2026 khan Khawzawl, Kawnzar veng a hmeithai Pi Lianngaihzami leh a fate chenna in tur mi inphal te thilpek lo lut ‘General Operating Fund’ cheng ₹4,57,333/- hmanga sak chu a hawnna neih a ni a, an bialtu pastor Rev R Lalrinmawia chuan Pathian hnena hlanna min neihsak nghal a ni. Pi Zamtei fate hi pali (4) an ni a, a upa ber dawttu hi mipa niin a mit a del avangin Special Blind School, Aizawl ah a awm mek a ni. A fa dangte pawh an felin lehkha an zir taima emem a, an nu hi mi huanah te a inhlawh kual lawp lawp thin.

He in sakna hmun hi an khaw VC te min pek a ni a, March 10, 2026 khan a sak hna tan a ni a, March 28, 2026 khan Pathian leh mi tlawmngai te zarah kan zo fel thei ta a ni.An veng YMA leh VC ten theih tawp min chhuah pui a, YMA section hrang hrang te chu an lo in hnatlan chhawk thin a ni. Tin, tui leh electric connection pawh a theih chin chin tihfel sak nghal an ni a. An bialtu SDO leh sawrkar lama thuneitu te pawn theih tawp min chhuahpui a ni.Pi Zamtei te nufa hian an veng ‘YMA In’ a thlawna luahin hun eng emaw chen an lo khawsa tawh thin a, nikum 2025 Christmas Charity Ride kan neih laia in chhar fuh kan ni.Chenna In thar an nei hi kan lawmpui takzet a, Pathian malsawmna dawnga hma sawn zel turin duhsakna sang ber kan hlan e.