A chanchin tawi

Pu David Lalremruata hi Falkland East ah a fate nen an cheng a. A nupui Pi Lalngaihi chuan vanduaithlak tak maiin March 14, 2026 zing khan chhul cancer avangin a boralsan a. Tunah hian a fapa pahnihte nen an khawsa mek a ni.

A natna chungchang

Pu David-a hi a thisen kal in block vangin a ke pahnih leh a kut zungtang a mawih a. Kum 2014 khan a kut zungtang mawih tan lehin doctor ten an tan khalh a, mahse zual lam pan zelin kum 2018 khan a ke dinglam pawh a mawih avangin an tansak leh ta a ni.

Tichuan kut zungtang leh ke pahnih bulin a lo awm ta a. A dam that laia Quarry a lung laa a inhlawh thin kha a chhunzawm thei ta lova. A nupui fanaute nen mi thil pek tlingkhawm ringin Falkland East mawng a mi thlam zimteah harsa takin an khawsa a ni.

Mi inphalte zarah

Mi thil phalte pawisa thilpek tlingkhawm cheng 7,36,055/- chu an chhungkua kan va hlan a. Heng thilpek hi an chenna in tur saknan te, an chhungkaw eizawnna bultannan te, an fate zirna senso atan te leh chhungkaw mamawh leinan te hman tur atih a ni. Tichuan an chenna in tur kan sak hi July 15, 2023 khan an pafa in an luahlut ve tawh a ni.

A nupui a Cancer

Pu Davida hi a kut leh ke bul chungin Falkland Bazarah a nupui leh fate chawmnan chawhmeh zuarin zing dar 7:00 atang a zan dar 7:00 thleng a thu ve thin. An chhungkaw khawsak a ziaawm ve chho tan dawn ni a a lan laiin vanduaithlak takin a nupui Pi Lalngaihi chu chhul cancer stage 4 a ni tih hmuhchhuah leh a ni a. In enkawlnan pawisa a ngaih tam em avangin mi inphalte thilpek lo lut khawm cheng 4,57,119/- chu October 28, 2024 khan kan va hlan leh a ni.

Tichuan, Pu David-a nupui Pi Lalngaihi chuan chemo therapy te lain a inenkawl ve zel a. Nimahsela, vanduaithlak takin thla engemaw zat enkawl a nih hnuah a pasal fanaute chu chatuan ram a pansa ta a ni.

An pafa hoin

Pu David-a leh a fapa te pahnih hi an nuin a boralsan avang hian an khua a har hle thin a, ngai an la awh thei meuh lo. A khat tawkin keini pawhin kan va tlawhin an chanchinte pawh kan thli thlai ve reng bawk a ni.

Pu David-a hi pa taima tak a ni a, amah enkawltu ber a nupuiin a boralsan hnu pawhin a theih ang angin a fate chawmnan a phak tawk tawkin hna a thawk ve hram hram thin.

Vawk pahnih a vulh ve a, amaherawh chu kut leh ke bul anih avangin vawk vulhna atan a chakkhai han lakkhawmte a harsat ve thin a, a fapate pahnih pawh theih ang anga enkawlin sikul an kal fel hnuah a vawkte chu a enkawl chhunzawm thin. Chutianga phak tawk a a vawkte a enkawl lai chuan a vanduaina a kaltluang rih hle mai a, vawk hri leng avangin a vawkte te chu an thi leh ta vek a ni.

An pafa hian ngaihtuah an ngai rih hle mai a, kan theihtawpin an chanchin kan ngaihven reng a, mi thil phal tak tak, ngaihsaktu an nei zel bawk a, vawkte lo pe phaltu te pawh a nei lehzel a, tunah hian vawk vulh leh thei turin hma kan la leh mek a ni.